ნაცემი მრევლბიჭუნა – “მეც პიდარასტებს ვეძებ ძმაო. არ მომკლათ”

“მამაო” – “აქ არ ცემოთ ეკლესიის ეზოა. გარეთ გაიყვანეთ ბიჭო.”

მინდოდა დამეწერა წვრილად და მაღალფარდოვნად. რაც მეტი დრო გადის, მით მეტად მიჩნდება სურვილი ვისაუბრო მხოლოდ მთავარზე. მთავარი კი შემდეგია: საქართველოში ფაქტიურად გაფორმდა თეოკრატია.  დარჩენილია იურიდიული გაფორმება, რაც “ჰომოსექსუალობის პროპაგანდის ამკრძალავი” კანონის შემოღებით დაიწყება და გაგრძელდება იქამდე, სადამდეც გარყვნილი კლერიკალების ფანტაზია გაწვდება. სულ  ბოლოს, ირანში, მოსახლეობას მასიურად ჩამოუარეს და პატარა ძაღლები ჩამოართვეს… ქალებს რომ შარვლის ჩაცმა და უნივერსიტეტში სწავლა აგეკრძალებათ, ეს ზუსტად ვიცი. მეტს ჩემი ფანტაზია მათ მაგივრად ვერ ქაჩავს.

ახლა კი მთავარი სათქმელი:

ვინც პოლიციას აქებთ და ამბობთ, რომ გმირობა ჩაიდინეს, ურცხვად ცრუობთ. უკვე აღარ არის საიდუმლო, რომ პოლიციას აგრესია არ ემუქრებოდა. გარიგებულები იყავით ეკლესიასთან და პატრულზე არ იყო “მრევლი” დაგეშილი. ვისზეც დაგეშილი იყო, იმათ ისე ეძებდნენ, რომ თავისიანები შემოელახათ ქაშუეთის ეზოში. უბრალოდ, ვერ გათვალეთ, პანდორას ყუთს რომ გახსნი და ბოროტებას გამოუშვებ, ჩემი-შენის გარჩევა აღარ აქვს. თანაც, ამდენი ელჩი აკვირდებოდა აქციას და მთლად სასიკვდილოდ ვერ გაამეტებინებდით “უმცირესობებს”. არ გეგონათ როცა გეუბნებოდით, რომ მართლა კრიმინალების ბანდაა ეს და არა ქრისტეს სიყვარულით გაჟღენთილი მორალური უმრავლესობა ხომ?  ახლა ხომ დაინახეთ? თუ ჯერ კიდევ ვერა? არა უშავს ჩემო ძვირფასებო, “ეს არ იყო ერთჯერადი აქტი” –  ასე გეუბნებათ პატრიარქის ქორეპისკოპოსი იაკობი. ეს მიმართვა ეხება თინა ხიდაშელს, ღარიბაშვილს, უსუფაშვილს, წულუკიანს, კბილაშვილს, ბიძინა ივანიშვილს – ყველას, ვინც პოლიცია აქო.

აქ რიგითი პოლიციელების ქებით ვერ გამოვძვრებით. მეც უზომოდ მადლობელი ვარ მათი. მერე? ეს რა შუაშია სახელმწიფო გადატრიალება რომ მოხდა იმასთან? აქ აღარ არის საუბარი კონსტიტუციის დარღვევაზე, სადარბაზოში გამოკეტილ გოგოებზე რომლებსაც ბოთლებს უშენდნენ, გატეხილ თავებზე, სიკვდილის შიშზე რაც თქვენი უპასუხისმგებლობით განიცადეს ადამიანებმა, რომლებიც სასტიკად მოგვატყუეთ – დაგიცავთო. ამაზე პასუხს ცალკე მოგთხოვთ იქ სადაც ხელი მიუწვდება ცივილიზაციას.  პოლიციის ქება არ გიშველით სტრასბურგში. მთელმა დედამიწამ ნახა რაც მოხდა

ჟარგონისთვის მომიტევეთ და ეკლესიამ “გააბაზრა თავად რომ აძლევდა ინსტრუქციას პოლიციას. პრინციპში, ჩვენც გაგიბაზრეთ მანამდე. რაც მე გუშინ ნეტგაზეთს ინტერვიუში ვუთხარი, დღეს ეკლესიის წარმომადგენელმა თავად გაახმოვანაა – პოლიცია გთავაზობდა აქციის მონაწილეთა სხვაგან გადაყვანას და თურმე ეს ეკლესიის იდეა ყოფილა. უბრალოდ ვისაც გაურიგდით, 12.41-დან 12.45-მდე არ დაგაცადათ ყველას მოგროვება და სისხლის სუნი რომ იყნოსეს, მერე ვეღარ დაიკოდნენ. შემდეგ როგორც მართა პოლიცია მორალურმა უმრავლესობამ, რომელიც ჯარისკაცების სიკვდილით იყო დამწუხრებული, ვიდეოებშიც ჩანს. ნუღა დამალინკინებთ. ზოგი თქვენგანი მაინც იტყვის, არ გვინახავსო.  ნერვებს მაინც აღარ მოვიშლი.

ჰოდა, ჩემო მეოცნებე ხელისუფალნო, აღარ უნდა ამ საქმეს კეკლუცობა. ხმა იმისთვის არ მომიცია, რომ ჩვენს ზურგს უკან იღებდეთ კონსტიტუციის დარღვევის ეშმაკურ გადაწყვეტილებებს. არაფერი არ დაიმალა, ვერ ხედავთ? სცადეთ დასავლეთი გაგეცურებინათ, თან ჩემი უსაფრთხოება დაგეცვათ და რადგან ეკლესიამ ასე გიბრძანათ, აქციაც ჩაშალეთ.  საბოლოოდ ვინ აღმოჩნდა გაცურებული? თქვენ! ცხვირწინ აგაწაპნეს ჯერ კიდევ ბოლომდე ვერ მოპოვებული ფაქტიური ძალაუფლება.

მალე თქვენც გადაგაყირავებენ და ჩუმად პანიკას, სჯობს ერთად ვიმსჯელოთ როგორ დავიცვათ ეს საერო სახელმწიფო.

პანდორას ყუთი უნდა დაიხუროს და ამას მარტო, ჩუმად ვერ მოახერხებთ. ითხოვეთ დახმარება და ყველანი ჩავერთვებით.

“იდენტობა” სპეციალურად გაჩუმდა და არცერთი კომენტარი არ გააკეთა, რადგან უჩვენოდაც მშვენივრად გამოჩნდა რა მოყვება უმრავლესობის ტირანიას – ქაოსი.

P.S. – მანანა კობახიძე და საგანელიძე გააჩუმეთ სანამ დროა.  ”იდენტობას” თავს ესხმიან და არ დაგავიწყდეთ, მთელი მსოფლიო გიყურებთ. რაც არ უნდა მოიგონონ ამ ჭკუასუსტებმა, ფაქტია, რომ პოლიციასთან ვითანამშრომლეთ, ყველა რჩევა შევასრულეთ, ხმა არ გაგვიღია იქ, არც თარიღი მოგვიგონებია და არც კონსტიტუცია დაგვირღვევია. შარში გაგხვევენ ეგ იდიოტები.